By : Shankar Tadas
गडचांदूर : कोरपना तालुक्यातील बिबी येथील रामनगरमधील शिवराज पांडुरंग जाधव (२१) या युवकाची चाकूने गळ्यावर व चेहऱ्यावर सपासप वार करून भरदिवसा हत्या केल्याने एकच खळबळ उडाली. ही घटना गुरुवार, दि. ६ रोजी दुपारी १२.३० वाजताच्या दरम्यान घडली.
अविनाश राधाकृष्ण पिल्ले (३०) व आशिष राधाकृष्ण पिल्ले (२४) रा. रामनगर बिबी अशी आरोपीची नावे आहे. सविस्तर वृत्त असे की, घरगुती विषयावरून मृतक व आरोपींचा वाद झाला. गुन्हेगारी पार्श्वभूमी असलेला अविनाश पिल्ले ह्याने त्याच्या भावाच्या मदतीने शेजारी राहत असलेल्या शिवराजची हत्या करून कब्रस्तानकडे जाणाऱ्या रस्त्याच्या कडेला त्याला फेकून दिले.
घटनेची माहिती मिळताच गडचांदूर येथील ठाणेदार शिवाजी कदम सहकाऱ्यांसह घटनास्थळी पोहोचले. घटनेत संपूर्ण परिवार सहभागी असल्याचा आरोप उपस्थित वॉर्डवासीयांनी केला व संपूर्ण परिवाराला हत्या प्रकरणात आरोपी बनवण्याची मागणी केली. हत्या करतात अविनाश पिल्ले ह्याने पोलिसांना समर्पण केले असून दुसरा आरोपी व आई वडील पोलिसांच्या हाती लागले नाही.
आरोपी अविनाश पिल्ले याने नांदा फाटा स्थित उपविभागीय पोलीस अधिकारी कार्यालय गाठत स्वतःला पोलिसांच्या स्वाधीन केले. मात्र आशिष फरार होण्यात यशस्वी झाला. घटनेची माहिती मिळताच पोलीस उपविभागीय अधिकारी रवींद्र जाधव, गडचांदूर पोलीस स्टेशनचे ठाणेदार शिवाजी कदम यांचे नेतृत्वात पीएसआय कुमारी प्रीतम पिंपळकर, पोलीस हवालदार संदीप आडकिने, तिरुपती माने, संदीप थेरे, सुरेश बल्की, महेश चव्हाण, शीतल बोरकर यांचे पथक दाखल झाले.या पथकाने घटना पंचनामा करत मृतदेह उत्तरीय तपासणीकरिता गडचांदुर ग्रामीण रुग्णालय पाठवण्यात आला.
*आरोपीची पार्श्वभूमी*
आरोपींवर यापूर्वी अनेक गुन्हे दाखल असून वार्डात महिलांना धमकी देणे, चाकू दाखविणे, अश्लील शिवीगाळ करणे व लोकांमध्ये भीतीचे वातावरण निर्माण करणे असे अनेक आरोप आहे. त्यात आरोपीला त्याच्या आई-वडिलांचे सुद्धा सहकार्य असल्याचा आरोप स्थानिक नागरिकांचा आहे. त्यामुळे संपूर्ण परिवाराला येथून स्थानबद्ध करण्याची मागणी नागरिकांनी केली.
